Þingskjal 354 — 304. mál.

Frumvarp til laga um heimild fyrir ríkisstjórnina til að samþykkja hækkun á kvóta Íslands hjá Alþjóðagjaldeyrissjóðnum og til að staðfesta fyrir Íslands hönd breytingar á stofnskrá sjóðsins. (Lagt fyrir Alþingi á 140. löggjafarþingi 2011–2012.)

S.l. föstudag var karpað á Alþingi Íslendinga um hvort heimila ætti ríkisstjórn Íslands að samþykkja hækkun á s.k. kvóta Íslands, sem er í raun fjárframlag Íslands til Alþjóðagjaldeyrissjóðsins (AGS). AGS var stofnaður skömmu eftir lok síðari heimsstyrjaldarinnar og var Ísland eitt af 29 stofnríkjum hans. Í dag eru 187 ríki aðilar að honum.

Nú hefur Ísland nokkrum sinnum tekið lán hjá sjóðnum. Fyrst árið 1960 uppá 6,8 milljónir USD og var það tekið í tengslum við efnahagsaðgerðir þáverandi ríkisstjórnar. Síðan þá hefur Íslandi gengið illa að forðast þessi blessuðu smálán vegna halla á viðskiptum við útlönd: 15 milljónir USD á árunum 1967–1968, 62,2 milljónir SDR 1974–1976 og 21,5 milljónir SDR árið 1982 úr lánaflokki sem er ætlaður til að mæta útflutningsbresti. Á sama ári tók Ísland einnig til sín 9 milljónir SDR af gjaldeyrisinnstæðu Seðlabankans hjá sjóðnum. Árið 2008 tók Ísland nýtt lán hjá sjóðnum í tengslum við sameiginlega efnahagsáætlun að fjárhæð 1.400 milljónir SDR. SDR stendur fyrir Special Drawing Rights eða Sérstök Úttektar Réttindi(SÚR). SÚR er ekki gjaldmiðill sem slíkur heldur stuðull á heimild til úttektar á gjaldeyri sem meðhöndlaður er af Alþjóðagjaldeyrissjóðnum. Gott og vel þá erum við komin að safaríka kaflanum. Kvóti Íslands hækkar úr 117,6 milljónum SÚR í 321,8 milljónir SÚR, sem jafngildir um 58,3 milljörðum ISK á skráðu miðgengi SÚR 23. mars 2011. Fjórðungur hækkunarinnar verður greiddur í SÚR en þrír fjórðu hlutar greiðast í íslenskum krónum, sem fáir vita hvers virði er. Sá hluti kvótahækkunarinnar, sem greiddur er í SÚR er að fjárhæð um 51 milljón SÚR, sem er að jafnvirði rúmlega 9.254 millj. kr. Myndar þessi hluti sérstaka gjaldeyrisinnstæðu hjá Alþjóðagjaldeyrissjóðnum og telst áfram til gjaldeyrisforða Seðlabankans. Þrír fjórðu hlutar kvótahækkunarinnar eru ekki inntir af hendi heldur eignast AGS innstæðu í Seðlabankanum sem nemur umræddri fjárhæð. Hlutdeild Íslands í kvótum Alþjóðagjaldeyrissjóðsins hækkar nokkuð við þessa ágætu breytingu, úr 0,055% í 0,067%.

Þannig að, allan liðlangan daginn, var karpað og þráttað um hvort við ættum að heimila ríkisstjórn Íslands, sem er aðili að Alþjóðagjaldeyrissjóðnum og alltaf að fá lán hjá honum, að samþykkja hækkun á fjárframlögum til sjóðsins. ¾ hækkunarinnar þarf ekki að greiða heldur verður það fært, strikað, krassað og krossað í bókum og við eftirlátum AGS að geyma fyrir okkur 25% eða um 9 milljarða sem við kunnum ekki að fara með.

Much ado about nothing, anyone?